如果人工淚水只可以紓緩一陣，問題可能藏得更深，就喺眼皮邊嘅細小油脂腺入面。
強脈衝光（IPL）係一種溫和、非入侵性嘅診所治療，適用於瞼板腺功能障礙（MGD）引起嘅乾眼。IPL 最初用喺皮膚護理，後嚟應用到眼皮護理。臨床研究顯示，佢有助改善腺體功能同淚膜穩定度。
以下同你講解 IPL 點樣運作、療程有咩感覺，同埋點樣知道適唔適合你。
IPL 點樣幫助乾眼？
IPL 會以柔和、受控嘅光脈衝，作用喺下眼皮少少下面嘅皮膚上，主要有兩個作用：
紓緩發炎
針對眼皮邊擴張嘅微細血管，減少腺體周圍嘅發炎。
幫助油脂流出
溫和熱能軟化腺體入面濃稠嘅油脂，令佢更容易釋出到淚膜。
當健康嘅油脂可以去到眼睛表面，淚水蒸發就會慢啲，眼睛亦會舒服啲。想了解更多瞼板腺嘅資料，可以睇睇我哋嘅瞼板腺功能障礙文章。
邊啲人適合 IPL？
IPL 通常適合：
- 因 MGD 引起嘅蒸發過快型乾眼
- 眼皮邊紅腫或發炎，包括同玫瑰痤瘡有關嘅乾眼
- 用編含油脂成分嘅眼藥水（例如 Cationorm® 凱舒諾®），症狀仍然持續
- 就算有定期用眼皮清潔產品（例如 Blephaclean® 碧潔靈®），眼皮仍然反覆不適
以下情況可能唔適合 IPL
膚色好深、最近曬黑、眼周皮膚有感染，或者有某啲對光敏感嘅狀況或藥物，都可能唔適合 IPL。所以每次都會先做全面乾眼評估。
Réspa IPL 療程流程
- 1先做評估
治療前，我哋會了解你嘅症狀，再用瞼板腺影像同淚膜檢查睇清楚腺體，確定 IPL 適合你。 - 2保護眼睛
整個治療過程都會用保護罩蓋住雙眼。 - 3IPL 治療
先塗上冰涟凝膠，再喺下眼皮下面打光。大部分人覺得係輕微溫熱，或者好似橡筋輕輕彈一下，大約 15 分鐘。 - 4瞼板腺疏通（MGX）
趣油脂仍然軟嘅時候，視光師會輕輕疏通腺口，幫油脂排出。 - 5治療後護理
我哋會建議簡單嘅屋企護理，例如熱敷、眼皮清潔同含油脂成分嘅眼藥水，幫助維持效果。
治療後一般唔使休息，皮膚可能會微微粉紅一陣，之後可以照常生活。建議治療位置做好防曬。
需要做幾多次？
IPL 以療程形式效果最好。臨床研究一般會做 3 至 4 次，每次相隔大約 2 至 4 星期。
有啲人做完頭一兩次已經覺得眼睛舒服啲，亦有啲人需要多啲時間慢慢改善。由於 MGD 通常需要長期跟進，間中做維持療程可能有助保持舒適。視光師會按你嘅檢查結果制定合適方案。
效果因人而異，配合良好嘅屋企護理，IPL 嘅效果會更理想。
IPL、RF 同 MGX 有咩分別？
三種治療各自針對 MGD 嘅唔同部分，經常會配合使用：
| 治療 | 主要作用 | 常見適用情況 |
|---|---|---|
| IPL 強脈衝光 | 紓緩眼皮邊發炎、軟化油脂 | 眼皮邊紅腫發炎、玫瑰痤瘡相關乾眼 |
| RF 射頻 | 以溫和熱能深層溫熱眼皮 | 油脂好濃稠、較頑固 |
| MGX 瞼板腺疏通 | 疏通阻塞嘅腺口 | 腺口明顯阻塞，常喺 IPL 或 RF 之後進行 |
沒有一種「最好」嘅選擇，最合適嘅配合要睇你嘅檢查結果。
常見問題
IPL 會唔會痛？
大部分人都覺得舒適，通常係輕微溫熱，或者好似橡筋輕輕彈一下嘅感覺，冰涟凝膠亦會令過程更舒服。
IPL 對眼睛安唔安全？
治療時雙眼會完全用保護罩蓋住，光只係作用喺眼皮下面嘅皮膚，唔係直接照眼睛。治療前亦一定會先評估適唔適合。
做完 IPL 可唔可以化妝？
建議當日治療位置唔好化妝，同埋做好防曬。視光師會同你講解簡單嘅治療後護理。
醫療保險會唔會保 IPL？
要睇你嘅個人保单，好多保单都未必包括。建議先同保險公司確認，我哋亦可以提供清晰嘅治療方案同收據。
做完 IPL 仍然要滴眼藥水嗎？
通常一段時間內仍然需要。IPL 配合熱敷、眼皮清潔同含油脂成分嘅眼藥水效果最好，好多人慢慢會發現需要滴嘅次數少了。
想知 IPL 適唔適合你？
第一步係做一次詳細乾眼評估。我哋會同你一齊睇清楚瞼板腺同淚膜狀況，再建議最適合你對眼嘅方案，未必一定要做 IPL。歡迎預約檢查了解更多 🤍
預約檢查Réspa 視光及乾眼護理中心
油麻地彌敦道 363–373 號恒成大廈 1303 室
上午 11 時至晚上 7 時 · 逢星期三、五休息
關於作者
由 Réspa 註冊視光師撰寫。Réspa 由三位視光師創立，專注全面乾眼評估同護理，將實證視光護理同舒適嘅 wellness 體驗結合。
參考資料
- Jones L, et al. TFOS DEWS II Management and Therapy Report. The Ocular Surface, 2017.
- Toyos R, et al. Intense pulsed light treatment for dry eye disease due to meibomian gland dysfunction; a 3-year retrospective study. Photomedicine and Laser Surgery, 2015.
本文內容只供一般健康資訊參考，不能取代專業眼睛檢查。如有任何眼睛不適，請諮詢註冊視光師或眼科專科。
